In het joar 1946 nemen Jan en Mina van Koot de harbarg mit angrenzende barbierzake over.Jan is van hûus ûut barbier en Mina stit alle dagen achter de toog. Veureers pachen ze de hellefte van ’t gedôo mer noa een poar joar konnen ze de hele handel kopen en hemmen ze ’t woenhûus dat ‘r an vaste zat bie de gelagkamer an ‘etrökken. An de toog kwammen steeds meer vaste bezeukers en Jan gung dus ôok mer achter de toog stoan. Heel wat visserlûu en jagers hemmen in déé tîed doar de starkste en spannendste geschiedenisse verteld as ze an ’t biljarten waan. In de zake stoan nog grote opgezette snoekboazen déé Jan zellefs ‘evöngen had. De barbierzake wönnen in déé tîed an de gank ‘ehuilen deur een nieje jonge barbier Henk Bouw (Touwtje). Déé hef dat toch mer mooi wè veertig joar vol ‘ehuilen.Jan en Mina hemmen samen twee kîenders ‘ekregen, eers een zeune en tôo wat joaren loater nog een dochter. De zeune Henk hef de hele bedoenige van zîen voar en moar over’eneumen, samen mit zîen vrouwe Didy. Jan en Mina trekken van Drees en goan ’t wat rustiger an dôon.Henk begint een bietjen reurige te maken mit specioale bieren. In ’t begin van de joaren tachtig krig ‘e twee extra tapkroanen an de toog um specioal bier an de man te brengen.D’r wönnen ôok nog mer effen twee nieuwe biljarttoafels an ‘eschaf en de woenkamer achter de gelagkamer wönnen een speciaal biljartzoaltjen.Henk en Didy déé kregen twee dochters en in ’t joar tweedûuzend kwam de darde generoatie as anvulling achter de toog. Dat was Wilma, de jongste van ’t stel, déé d’r wè schik van had.Mer slim genôg, een joar loater raken Didy ûut de tîed en gungen voar en dochter mit zîen tweeën vèerder. Samen binnen ze nog steeds an de gank mit speciaalbieren en hemmen ze de sorterige ûut ‘ebreid noar zes bieren an de tap en mer liefs veertig soorten ûut de flesse.Mû’j’ ’s in de whiskeykaste kommen kîeken, dan wete je nîet wat ô’j’ zien.

Op 20 mei 2006 hemmen ze ’t zestig joarig bestoan mit zîen dreeën ûutbundig ‘evierd, Mina, de zeune Henk en déé zîen dochter Wilma en ja wisse, netuurlijk ôok mit de medewarkers en alle trouwe bezeukers. Went behalleve de dree generoaties achter de toog, zitten d’r ôok vake dree generoaties veur de toog.